Штетите предизвикани од катастрофалните земјотреси во Турција на почетокот на февруари достигнаа бројка од 103,6 милијарди долари, што е околу девет отсто од проектираниот БДП за 2023 година, соопшти денеска Министерството за финансии во Анкара.
Таа сума е шест пати поголема од штетата предизвикана по земјотресот во Мармара во 1999 година.
Најголем дел од штетата, 54,9 отсто, е причинета на станбени згради во износ од 56,9 милијарди долари, објави порталот на турскиот канал „НТВ“.
Штетата на јавните инфраструктурни и комунални објекти е 12,9 милијарди долари, додека штетите во економскиот сектор изнесуваат 11,8 милијарди долари, јави Танјуг.
Во таа бројка се вклучени штетите направени во енергетиката, туризмот, здравството, образованието и други сектори.
Во Турција, како резултат на земјотресот од 6 февруари, загинаа речиси 50.000 луѓе.