САД официјално потврдија дека армијата на Мјанмар извршила геноцид и злосторства против човештвото со насилство врз малцинството Рохинџи, изјави денеска американскиот државен секретар Ентони Блинкен, предупредувајќи дека се додека хунтата е на власт, никој во земјата нема да биде безбеден.
Објавувајќи ја одлуката, Блинкен истакна дека нападите врз Рохинџите биле „широко распространети и систематски“ и дека доказите укажуваат на јасна намера да се уништи ова муслиманско малцинство.
Во својот говор во американскиот Меморијален музеј на Холокаустот во Вашингтон, највисокиот американски дипломат прочита трагични и застрашувачки извештаи за жртвите, кои биле застрелани во глава, силувани и малтретирани.
Вооружените сили на Мјанмар започнаа воена операција во 2017 година со која беа принудени најмалку 730.000 главно муслимански Рохинџи да ги напуштат своите домови и да заминат во соседен Бангладеш. Во 2021 година, војската на Мјанмар ја презеде власта со државен удар.
Извор: МИА