Американскиот Конгрес пред неколку недели ја одобрил испораката за Хрватска на 16 лесни разузнавачки борбени хеликоптери „Кајова вориор“, согласно програмата за подарување на вишокот хеликоптери од составот на американската армија, информира хрватскиот весник „Јутарњи лист“.
Вкупната вредност на подарокот изнесува 100 милиони долари, а во следните три години хрватската армија ќе треба да плати околу 20 милиони долари за резервни делови, обука и муниција за нив.
Хеликоптерите се целосно модернизирани и ремонтирани во 2011 година и се снабдени со најсовремена техника, неопходна за военото разузнавање.
Хрватска хеликоптерите ќе ги користи за одбрана на својата територија, за набљудување на границите, како и за учество во меѓународни операции.
Борбените хеликоптери се очекува во земјата да пристигнат до крајот на 2016 година.