САД ги укинаа своите санкции против Либерија, кои пред повеќе од една деценија ги воведоа врз режимот на поранешниот либериски претседател Чарлс Тејлор, пренесе ДПА.
Американскиот претседател Барак Обама го потпиша указот за повлекување на санкциите поради постигнатиот напредок во оваа западноафриканска земја и пресудата од 50 години затвор за Тејлор во 2012 година.
Портпаролот на Советот за национална безбедност на Белата куќа, Нед Прајс, го истакна „огромниот напредок на Либерија по завршувањето на граѓанската војна во 2003 година, посебно нејзиниот ангажман кон демократијата и развојот на политичките, административните и економските институции“.
-Либерија им оддолеа не само на раните од војната, туку и на предизвикот да реагира на досега незабележената епидемија од ебола минатата година, рече Прајс.
Тој, истовремено, додаде дека во земјата останува да се заврши уште многу работа, каде следната година завршува мисијата на ОН, а за 2017 година се закажани претседателксите избори.
Санкциите беа насочени против членови на семејството Тејлор и неговиот режим и лица, замешани во незаконско присвојување на ресурсите на земјата. Првично санкциите забрануваа и увоз на дрвопреработувачки производи и дијаманти од Либерија, но овој дел од санкциите претходно беше укинат.