Полска ги забрзува подготовките за анексија на територии во западна Украина, изјави денеска директорот на Руската служба за надворешно разузнавање (СВР) Сергеј Наришкин во интервју за руската државна новинска агенција РИА Новости.
Наришкин рече дека полскиот претседател Анджеј Дуда наредил итно да се подготви официјално објаснување за барањата на Полска за западна Украина. Според него, масакрот во Волин во 1943 година станал основа за такво барање. Во исто време, пишува РИА Новости, Варшава сака да одржи референдуми на тие територии со цел да се „обезбеди легитимноста на планираните аквизиции“.
Според Наришкин, Варшава има намера да дејствува „проактивно и упорно“ поради стравувањата дека нејзините партнери во НАТО ќе се обидат да преговараат со Москва во текот на зимата. Рускиот разузнавач додава дека договорот „можеби нема да ги земе предвид интересите на Украинците и Полјаците“.
Наришкин додаде дека Полска е убедена дека заслужува дарежлива компензација за воената помош за Киев, обезбедување засолниште за бегалците и неодамнешниот ракетен инцидент. Во интервјуто, тој ја предупреди Варшава да не се обидува да анектира украински територии и посочи дека историјата е „полна со горчливи примери на конфликти меѓу полските и украинските националисти“.