Девет бродови на руската и на кинеската морнарица почнаа во Медитеранот заеднички воени маневри кои ќе траат до 21 мај, соопшти руското Министерство за одбрана.
Вежбите се одржуваат во момент на големи тензии меѓу Русија и Западот поради Украина и се поизразените кинески територијални претензии над Јужното Кинеско Море.
Штабот на маневрите е на рускиот носач на ракети Москва, кој е дел од Црноморската флота со база на Крим. Вежбите се под назив Поморска соработка 2015 и според руски претставници „не се насочени против некоја трета држава“.
Рускиот вицеадмирал Александар Фодетенков вели дека цел на маневрите е „јакнење на взаемното разбирање меѓу морнариците на двете држави со цел унапредување на стабилноста и спротиставување на новите предизвици и закани од море“.