Русија ќе биде принудена да воведе реципрочни мерки, ако Украина забрани на своја територија летови на руските авиокомпании, изјави рускиот Министер за транспорт Максим Соколов, пренесува ТАСС.
Соколов нагласи дека Москва, првпат се информирала од медиумите, за намерите на владата на Арсениј Јацењук да забрани летови на „Аерофлот“ и „Трансаеро“ на територија на Украина.
Според Соколов тоа фактички ќе доведе до прекин на воздушните врски меѓу двете земји и на прво место ќе бидат оштетени граѓаните на Украина.
Украинските санкции ќе доведат до прекин на летовите на руски компании до Молдавија, предупреди претседателот на Асоцијацијата на компании од воздушниот транспорт (АЕВТ) Владимир Пасун.
Според него да се лета до Молдавија, заобиколувајќи ја Украина е економски неисплатливо. – Заобиколувањето на Украина до Европа и Турција трае 40 минути, а до Молдавија се потребни најмалку половина час, нагласи Пасун.