За посветла иднина на еврозоната потребна е поголема економска и правна централизација, за да се избегне повторувањето на претходните грешки кои за малку не го потопија целиот проект, изјави денеска претседателот на Европскиот совет Херман Ван Ромпуј.
Во текстот со наслов „Кон права економска и монетарна унија“, подготвен за самитот на лидери на ЕУ, што ќе се одржи следната недела, Ромпуј изнесува јасен распоред за усвојување на мерки со кои значително би се зацврстиле темелите на еврото.
Некои мерки се технички, како организирање на надзор на сите европски банки, додека другите се политичките, како за улогата на националните парламенти во контролирањето на буџетите. Тоа пред се однесува на Велика Британија која не сака да префрли повеќе суверенитет на Брисел за решавање на должничката криза.
– Одлуките за националните буџети се во срцето на парламентарните демократии земји-членки на ЕУ. Во исто време потребно е да се земе предвид заедничкиот интерес на Унијата, а националните парламенти не се во најдобра позиција тоа да го направат, посочува Ромпуј.