Високиот претставник на Европската унија за надворешна политика и безбедност Кетрин Ештон, еврокомесарите за трговија и за енергетика, Карл де Гухт и Гинтер Етингер, украинскиот претседател Петро Порошенко и рускиот претседател Владимир Путин ќе учествуваат на самитот на Царинската унија и Украина во Минск на 26 август.
Прес-службата на Европската комисија соопшти дека претседателот на ЕК, Жозе Мануел Барозо им наложил на Ештон, Де Гухт и Етингер да ја претставуваат Унијата на самитот, а за својата одука го известил и украинскиот претседател Петро Порошенко, со кого разговарал по телефон вчера и денеска.
Барозо го поканил Порошенко во блиска иднина да го посети седиштето на ЕУ во Брисел.
Иницираната од Москва Царинска унија ги обединува Белорусија, Казахстан и Русија и е дел од т.н. Евроазиска економска унија.
Рускиот претседател Путин ќе учествува на самитот во Минск, потврди прес-службата на Кремљ.
Портпаролот на Путин, Дмитриј Песков изјави дека претседателот ќе има повеќе билатерални средби во главниот град на Белорусија, но не прецизираше со кого.
– На разговорите во Минск ќе биде разгледана катастрофалната ситуација во источна Украина, посочи Песков.