Талибанските власти егзекутираа Авганистанец осуден за убиство – прва јавна егзекуција откако талибанците ја презедоа власта минатата година.
Егзекуцијата беше извршена во западната провинција Фарах пред неколку стотици луѓе и пред бројни талибански претставници, изјави Забинула Муџахид, портпарол на талибанската влада.
Тој рече дека одлуката за извршување на смртната казна била донесена „многу внимателно“, откако била одобрена од трите главни судови во Авганистан и врховниот водач на талибанците Мула Хаибатула Ахунџада.
Егзекутираниот Авганистанец беше осуден за убиство на маж пред пет години.
Извор: МИА