Европа, Јапонија и Канада се надеваат дека средбата на Г-7, која почнува денеска во Бари, ќе даде појасна претстава за плановите на американскиот претседател Доналд Трамп за клучните мерки, кои тој се уште не ги изнел детално.
Официјалната програма на средбата на министрите за финансии и гувернерите на централните банки од Групата седум најразвиени држави е насочена пред се на нееднаквоста, меѓународните даночни правила, кибер безбедноста и спречувањето на финансирањето терористи.
Учесниците на средбата, која ќе трае до сабота внимателно ќе го следат американскиот министер за финансии Стивен Манучин, за да ги дознаат американските намери по прашања, за кои Трамп се закани дека ќе ја разочара групата, протекзионизмот и климатските промени.
Трамп ќе одлучи дали САД ќе излезат од Париската спогодба за климата по средбата со лидерите на самитот на 26 и 27 мај, соопшти Белата куќа.
– Ако се земе предвид протекциоистичкото однесување на Трамп нема да има официјални дискусии за трговијата во Бари, изјави претставник на италијанското Министерство за финансии. Оваа тема ќе биде разгледана на самитот во Таормина, Сицилија, кон крајот на мај.
Иако не е вклучена во официјалната програма, според извори, ќе има и дискусии за олеснување на долгот на Грција пред средбата на министрите за финансии од еврозоната на 22 мај, која ќе биде посветена на отпушањето нови заеми за Атина.
Грчките кредитори, вклучувајќи ги Евцропската централна банка и Меѓународниот монетарен фонд ќе имаат свои претставници во Бари.
Министрите од Г-7 во Бари е планирано да потпишат декларација за борба против даночни измами и други незаконски финансиски активности. Тие ќе се обидат да изнајдат поефикасни начини за борба против перењето пари, затајувањето даноци и финансирањето на тероризмот.