Во близина на летната куќа на претседателот на Кипар Димитрис Христофијас полицијата денеска пронајде 1,36 килограми експлозив ТНТ.
Претставникот на полицијата Андреас Ангелидес изјави за новинарите дека експлозивот и детонаторот, подготвени за употреба, биле пронајдени на околу половина километар од летниковецот на претседателот.
Експлозивот бил скриен под едно дрво, околу 15 метри од главниот пат што води кон вилата на претседателот, во близина на јужниот крајбрежен град Лимасол.
Ангелидес рече дека експлозивот бил пронајден по дојава, а според државното радио, детонаторот можел да се активира од далечина.
Во вестите се истакнува дека претседателот планирал да го посети домот во попладневните часови, но му било кажано да не оди таму додека полицијата не заврши со истрагата.
Политички мотивирани напади во Кипар се реткост, но поради рецесијата, Христофијас и неговата влада станаа непопуларни.
Христофијас е првиот претседател на Кипар кој нема да се кандидира за реизбор, кога на островот се спроведуваат изборите во февруари.