Само два дена пред посетата на германскиот канцелар Ангела Меркел на Португалија илјадници португалски војници синоќа учествуваа во демонстрациите против мерките за штедење во оваа земја-членка на еврозоната, зафатена од кризата.
Околу 10.000 припадници на армијата, со различен ранг, протестираа против „неоправданите кастрења“ на плоштадот Реставрадореш, во центарот на градот, и го повика претседателот Анибал Каваку Силва да стави вето на спорниот рестриктивен буџет, одобрен од десноцентристичката влада.
Меркел инсистира земјите, како Португалија, Грција и Шпанија, да ги намалат своите трошоци за да ги ограничат своите растечки државни долгови.
Протестите на војниците беа насочени против натамошните кастрења на расходите во социјалната сфера и зголемувањето на даноците, но и кон специфичните проблеми на армијата, како недоволното финансирање за поддршка и ремонт на опремата и за воената обука.
Претходно, во вторникот, 5.000 полициски службеници учествуваа во најголемиот полициски протест во историјата на Португалија, на кој го изразија своето незадоволство од мерките за штедење.