Траен мир меѓу Украина и Русија практично е невозможен додека Владимир Путин е на власт во Русија, смета поранешниот шеф на британската надворешна разузнавачка служба МИ6, Џон Сојерс, во разговор за „Фајненшел тајмс“.
Според неговата оценка, малку е веројатно до крајот на 2027 година да биде постигнат сеопфатен мировен договор меѓу Украина и Русија. Најмногу што двете страни во сегашните услови би можеле да постигнат е намалување на интензитетот на војната на ниво слично на она по 2014 година, пренесе украинскиот портал ТСН.
Сојерс позитивно го оцени фактот што Соединетите Американски Држави продолжуваат со контактите со Кремљ. Истовремено, тој рече дека не е премногу уверен во способноста на актуелните американски пратеници да постигнат резултат, бидејќи барањата на Путин остануваат непроменети и, според оценката на поранешниот шеф на МИ6, се неприфатливи.
Според прогнозите на Сојерс, можност за успешни преговори за прекин на огнот би можела да се појави во 2027 година. За тоа е неопходно Русија и Украина сè посилно да ја чувствуваат економската и другата цена на војната, како и руските сили да ја изгубат можноста за напредување на фронтот.
Тој исто така посочи дека во Русија веќе се појавуваат сè повеќе гласови кои го доведуваат во прашање продолжувањето на војната и зборуваат за потребата да се најде излез од конфликтот.
Изјавата на Сојерс доаѓа во време на нов круг американска дипломатија. Претставниците на Доналд Трамп, Стив Виткоф и Џаред Кушнер, на 5 септември допатуваа во Москва со предлог за прекин на војната, по што треба да го посетат и Киев.
Претходно „Блумберг“ ги оцени очекувањата од разговорите на Виткоф и Кушнер во Москва како „исклучително ниски“. Соговорници на медиумот наведоа дека претходните посети на американски претставници во Русија не донеле резултати, како и дека во Кремљ не гледаат причини да веруваат дека Вашингтон овојпат подготвил предлози што Москва е подготвена да ги прифати.
Неговиот поранешен колега, поранешниот директор на ЦИА, изјави дека Украина е „воена лабораторија на 21 век“.