Шведското население е во постојан пораст со години наназад. На почетокот на јули годинава во Шведска се регистрирани вкупно 9.596.436 жители.
Според најновите податоци од шведското Централно статистичко биро (СЦБ), станува збор за пораст на населението за 40.543 лица во првата половина на 2013 година.
Во еден дел шведски општини е забележан пораст на населението за околу два процента.
Ваквиот развој се должи главно на зголемениот обем на имиграцијата во Шведска.
Најголемата група доселеници во изминатиот полугодишен период се сепак шведски државјани, кои се враќаат во земјата по извесен период на привремен престој во странство по разни основи.
Според најновите статистички показатели, најголеми воневропски имигрантски групи, кои во значителен дел даваат придонес во процентуалниот пораст на шведското население, се Сомалијци, Сиријци и Авганистанци.