Во срцето на крајбрежниот полски град Гдињ неодамна е отворен ресторан на чија врата пишува: Забранет влез за поддржувачите на Путин, а дозволен за гости со кучиња.
Името на угостителскиот објект е „Мала Украина”, а сопственик е Украинец.
Иако кај мнозинството Полјаци, постои голема антипатија кон рускиот претседател Владимир Путин, која постојано ја истакнуваат јавно, сепак ваквиот натпис предизвика негативни реакции во јавноста.
– Не сум поборник на мешање на политиката со туризмот, изјави Лукаш Магриан, заменик директор на Поморскиот регионален туристички сојуз.
Ова не е првпат во полските ресторани да се појави ваква форма на протест кон Русите и таквите чекори секогаш наидуваат на осуда од локалните и туристичките власти.