Директорот на американската Централна разузнавачка агенција, Џон Рeтклиф, ја искористи ненајавената посета на Москва за да ја предупреди Русија за можна ескалација кон балтичките членки на НАТО, но и да побара намалување на поддршката за Иран, објави Политико, повикувајќи се на извори запознаени со разговорите.
Според медиумот, Рeтклиф им рекол на руските претставници дека Москва не треба да презема никакви чекори што би можеле да доведат до влошување на односите со американските сојузници во НАТО, особено Естонија, Латвија и Литванија.
„Целта на неговиот состанок беше првенствено да ја предупреди Русија против какви било ескалациски дејствија против балтичките држави“, рече еден од изворите.
Слични извештаи објавија и CBS News и Wall Street Journal, според кои извори во Вашингтон се загрижени дека Москва би можела да го тестира единството на НАТО и подготвеноста на САД да ги брани своите сојузници. Сепак, американската страна не презентираше јавно докази дека Русија подготвува напад врз која било од членовите на Алијансата.
Друга важна тема на разговор, како што тврди Политико, беше Иран. Наводно, Рeтклиф се обидел да ја убеди руската страна да ја ограничи воената и економската поддршка за Техеран, во време кога Вашингтон ги засилува санкциите и политичкиот притисок врз иранските власти. Ниту ЦИА ниту руската страна официјално не потврдија дека ова прашање било дискутирано.
Рeтклиф пристигна во Москва на 25 август, без претходна најава. Неговото пристигнување првпат го објави дописничката на CBS News, Џенифер Џејкобс, откако американски воен транспортен авион беше забележан на московскиот аеродром, а потоа и дипломатски конвој на улиците на руската престолнина.
Тоа беше првата позната посета на Рeтклиф на Русија откако беше назначен за директор на ЦИА и, според Аксиос, највисок функционер во администрацијата на американскиот претседател Доналд Трамп во Москва од јануари.
Портпаролот на Кремљ, Дмитриј Песков, потврди дека Рeтклиф разговарал со руски разузнавачки претставници, но нагласи дека средба со претседателот Владимир Путин не е ниту планирана, ниту одржана.
Песков додаде дека Путин бил веднаш информиран за резултатите од контактите, но не ја откри нивната содржина. Кремљ ги смета овие разговори за корисни, иако, како што изјави портпаролот на рускиот претседател, сè уште е рано да се каже дали тие можат да придонесат за излегување на руско-американските односи од длабока криза.