Светската здравствена организација најави дека ќе го преиспита именувањето на социјалистичкиот владетел на Зимбабве Роберт Мугабе како „амбасадор на добра волја“.
Именувањето на Мугабе предизвика бурни реакции. Тој е обвинет за автократско владеење со Зимбабве, напади врз опозицијата, одземање на имотите на белите фармери и за општото осиромашување на африканската држава.
Директорот на СЗО Тедрос Адханом Гебрејесус изјави дека оваа организација има пракса да именува вакви „амбасадори на добра волја“ со цел да сврти внимание кон одредено прашање, како на пример ангажманот на Анџелина Џоли како амбасадорка за бегалци или Малала Јузафзаи за прашањето на образованието. Сепак, Гебрејесус изјави дека СЗО ќе го преиспита изборот на Мугабе, по острите критики со кои се соочи.
Критиките за именувањето на Мугабе се совпаднаа со силните критики што американскиот претседател Доналд Трамп ги упати кон Обединетите нации и по повлекувањето на САД од УНЕСКО. И Британија го критикуваше именувањето на Мугабе за „амбасадор на добра волја“.