Над 45,2 милиони луѓе минатата година ги напуштиле своите домови, а повеќето од нив биле протерани од својата татковина поради конфликти, што претставува најголема бројка во последните 20 години, се наведува во најновиот извештај на ОН.
– Во 2012 година е регистриран најголемиот број на раселени лица од 1994 година, кога се случи геноцид во Руанда и распаѓањето на поранешна Југоаславија. Сведоци сме на избувнување на се повеќе нови конфликти, а истовремено старите воопшто не стивнуваат, истакна синоќа на прес-конференција раководителот на Високиот комесаријат за бегалци на ОН, Антонио Гутереш.
Околу 55 отсто од бегалците се од Авганистан, Сомалија, Ирак, Сирија и Судан. Во извештајот се додава дека големи бегалски бранови се забележани и во Мали и ДР Конго.
Од 45,2 милиони раселени лица, 15,4 милиони се бегалци, а од нив 4,9 милиони се Палестинци.
– Ескалацијата на насилството во Сирија не ветува подобра ситуација за оваа година, изјави Гутерес, повикувајќи ја меѓународната заедница да им ги олесни проблемите со кои се соочуваат Јордан и Либан, каде околу 20 отсто од населението се веќе Сиријци.