Генералното собрание на ОН синоќа усвои резолуција, со која Израел се повикува да се откаже од нуклеарното оружје и своите објекти да ги стави под меѓународна контрола.
За резолуцијата, која беше предложена од Египет и поддржана од други арапски земји, гласале 161 земја, пет биле против, а 18 воздржани.
Во текстот на документот се наведува дека Израел е единствена земја на Блискиот исток која не го потпишала Договорот за неширење нуклеарно оружје и затоа се повикува „без одложување“ да се придружи кон тој меѓународен договор и да ги стави своите нуклеарни објекти под контрола на Меѓународната агенција за атомска енергија (МААЕ).
Се претпоставува дека Израел поседува нуклеарно оружје, но Тел Авив ги отфрла ваквите тврдења.