Високиот комесар на ОН за човекови права, Зеид Раад ал Хусеин ја оквалификува операцијата на безбедносните сили на Мјанмар, против муслиманите Рохини, како „школски пример за етничко чистење“.
Ал Хусеин ги повика властите во Јангун да ја запрат, како што вели, суровата воена операција во мјанмарската северна провинција Рахине.
Повеќе од 300 илјади муслимани од оваа етничка заедница побегнаа во соседен Бангладеш, откако пред крајот на минатиот месец ескалира насилството.
Војската на Мјанмар, меѓутоа, ги отфрла ваквите обвинувања и тврди дека таа само реагирала на нападите од милитантните Рохини, како и дека операцијата што се води не е насочена против цивилното население.
Насилствата избувнаа на 25 август кога припадници на милитантните Рохини, нападнаа една полициска станица во провинцијата, убивајќи 12 полицајци.
Независни набљудувачи, сепак, посочуваат дека реакцијата на војската и на властите е прекумерна, исполнета со бруталност, со палење на цели села и на куќите на Рохините, со намера да протера цивилното население од територијата на која живеат, од провинцијата и од Мјанмар.
Рохините се припаднии на главно муслиманска етничка заедница која нема своја држава и кои се населени во провинција Рахине во Мјанмар, држава каде мнозинското од населението се будисти.
Властите во Јангун не ги признаваат како малцинство, туку само како илегални бегалци кои нелегално се населиле на крајниот северозапад од мјанмарската територија.
Милитантните Рохини вчера понудија прекин на непријателствата, но воените власти ја отфрлија понудата, тврдејќи дека нема да преговараат со терористи.