Претседателот во заминување на САД Барак Обама соопшти денеска дека ќе бидат укинати дел од санкциите против Судан како одговор на соработката на Картум во борбата против тероризмот, јави ДПА.
Извршната наредба, потпишана од Обама, ќе им овозможи на американските граѓани да вршат бизнис со физички и правни лица во Судан.
Укинувањето на санкциите ќе стапи во сила по 180 денови.
Целта на укинувањето е промовирање на земјата да направи повеќе за борбата против тероризмот и да ја подобри состојбата на човековите права, се наведува во соопштението на Белата куќа.
САД за првпат воведоа санкции за Судан во 1997 година поради тероризам и кршење на човековите права.
Во 2006 година, рестриктивните мерки беа зајакнати поради конфликтот во Дарфур.