Осум израелски партии потпишаа денеска коалициски договор, со што се овозможува формирање нова влада, која за првпат по 12 години, нема да ја предводи Бенјамин Нетанјаху.
Владата треба да положи заклетва в недела во Кнесетот, каде е договорено да добие поддршка од потребниот 61 пратеник.
Новата влада најавува ков курс насочен кон заздравување на поделбите во земјата и враќање на чувството за нормалност.
Новата владејачка коалиција, која има тесно мнозинство во Парламентот, се состои од осум партии, вклучувајќи дури и една арапска партија, првпат во историјата на Израел.
Единственото нешто за кое овие партии стопроцентно се согласуваат е дека Нетанјаху, кој е обвинет за корупција, мора веднаш да замине, како и околу тоа дека земјата не може да си дозволи нови избори.
Според договорот, во првите две години премиер ќе биде Нафтали Бенет, а потоа на чело на владата ќе дојде Јаир Лапид, кој му припаѓа на политичкиот центар.