Неколкустотици Чеси денеска учествуваа на редовните 16-ти по ред демонстрации за легализацијата на марихуаната во земјата, јави дописникот на МИА од Прага.
Акцијата е дел од светската кампања „Милион, Марихуана, Март“.
– Главното барање на демонстрациите е легализација на одгледување и поседување на марихуана и производи од коноп за сопствена употреба и тоа за лечење и рекреација, рече претставникот на чешкиот организатор Роберт Веверка.
За време на музичкиот хепенинг и маршот, полицијата уапси неколку лица под сомнение за сторени прекршоци поврзани со дрога. Анкетите, покажуваат дека повеќе од половина Чеси меѓу 15 и 34 години имаат барем еднаш пробано марихуана.
Едно неодамнешно истражување покажа и дека дури 53 проценти од анкетираните би се согласиле со легализација на рекреативното користење на оваа дрога.
И покрај тоа, таа останува илегална иако според последната одлука на власта од 1 април во Чешка е овозможено користење на марихуана на рецепт за лечење и медицински цели. Минатата година, во маршот во чешкиот главен град учествуваа околу 7.000 млади луѓе.