Над 1.300 мигранти се спасени вчера во Сицилијанскиот проток, соопшти италијанската крајбрежна стража, јави ДПА.
Изминатите недели по затворањето на т.н. балканска маршрута преку Турција и Грција, Италија се претвори во главна влезна точка за мигрантите од Блискиот Исток, Азија и Африка, кои се обидуваат да стигнат преку Средоземното Море во Европа.
Вкупно 1.348 лица биле спасени во 11 одделни операции вчера со учество на италијанската крајбрежна стража, европската военопоморска мисија во Средоземното Море, невладината организација „Мос“ со седиште во Малта и приватен реморкер.
Околу 48 илјади мигранти пристигнале во Италија од почетокот на годината, според податоци на Меѓународната организација за миграција.