Четворица набљудувачи на Организацијата за безбедност и соработка во Европа (ОБСЕ) веќе работат во руската Ростовска област, соопшти денеска шефот на Мисијата на оваа организација во регионот Пол Пикар.
– Ја формиравме првата група, која е подготвена да почне со работа. Сите нас не очекува доста работа. Четворицата наши набљудувачи веќе работат. Тука работам јас како главен набљудувач и има уште три лица од административниот персонал. Во најскоро време на групата ќе и се приклучат нови набљудувачи, изјави Пикар.
Задача на Мисијата ќе биде мониторинг на активностите на граничните премини „Гуково“ и „Доњецк“, додаде тој.
ИТАР-ТАСС јави дека во Ростовската обаст вчера пристигна првата група набљудувачи на ОБСЕ, кои ќе работат во реоните долж границата со Украина. Во овој регион ќе пристигнат вкупно 13 пратеници на ОБСЕ од осум држави – Франција, Велика Британија, Унгарија, Молдавија, Киргистан, Таџикистан, Казахстан и Украина.