Спасувачките тимови од Малта пронајдоа неколку стотици тела на жртви од катастрофалните поплави на плажата во либискиот град Дерна, соопштија денеска властите на Малта.
„Имаше околу 400 тела на плажата според прелиминарните проценки, иако е тешко да се каже точниот број“, изјави шефот на спасувачката екипа Наталино Безина за Тајмс оф Малта.
Таа земја испрати тим од 72 спасувачи, припадници на војската и цивилната заштита.
Четиричлениот тим најпрвин пронашол група од седум тела, меѓу кои и три деца, во пештера покрај морето.
Тимот продолжи со потрагата за откривање на мал залив полн со безживотни тела. Според последните податоци, повеќе од 11.000 луѓе загинале во поплавите во Либија, додека 10.000 се водат за исчезнати.