Рускиот претседател Владимир Путин денес ја обвини Германија дека подметнува докази за да ја обвини Москва за нападот со беспилотни летала минатиот месец на аеродромот во Лајпциг.
– Не е јасно зошто сето ова се прави. Постои само едно објаснување – потребата да се соочиме со агресивна Русија. Каде се доказите? Па, тие ги подметнаа, рече Путин за време на прес-конференцијата по посетата на Киргистан за самитот на Шангајската организација за соработка (ШОС), објави РИА Новости.
Како што изјави, со обвинувањата против Русија, германската влада се обидува да ги реши домашните проблеми предизвикани од падот на рејтингот на канцеларот Фридрих Мерц.
„Што се однесува до постапките на германските власти, мислам дека ова е првенствено поврзано со домашната политичка ситуација. Канцеларот е во тешка позиција на домашен план. Тој не ужива доверба кај своите граѓани и разбирливо е зошто, бидејќи не ги брани националните интереси, туку тргува со нив. Постојат очигледни економски грешки, бизнисите се затвораат, луѓето ги губат своите работни места, а животниот стандард паѓа“, рече Путин.
Полицијата во Лајпциг на 5 август извести дека вработен на аеродромот Лајпциг/Хале открил дрон што носел експлозиви во безбедносната зона за товар.
Германија ја обвини Русија за инцидентот, а рускиот амбасадор во Германија, Сергеј Нечаев, подоцна беше повикан во германското Министерство за надворешни работи, каде што ги отфрли обвинувањата на Берлин против Русија како неосновани, апсурдни и ирационални.