Високиот претставник на Европската унија за надворешна и безбедносна политика Федерика Могерини изјави денеска дека добила уверување на средбата со членови од администрацијата на американскиот претседател Доналд Трамп, оти САД ќе се придржува кон нуклеарниот договор на Иран со светските сили.
– Останав со убедувањето од она што го слушнав на средбите во Белата куќа и Стеј департментот дека САД се подготвени за целосна имплементација на договорот, посочи Могерини.
Шефот на европската дипломатија исто така наведе дека новата американска администрација се уште не одлучила кој ќе биде новиот амбасадор на САД во ЕУ, ниту што ќе се случи со блокираните трговски преговори меѓу Унијата и Вашингтон.
Могерини е на дводневна посета во Вашингтон, првпат по стапувањето на должност на новиот претседател Доналд Трамп.
Денеска таа разговараше со државниот секретар Рекс Тилерсон и се состана со Мајкл Флин, советникот на претседателот за национална безбедност.