Мичиген, една од клучните американски држави што ќе одлучат за победникот на претседателските избори, и натаму пребројува илјадници гласачки ливчиња.
– Неофицијални резултати се очекуваат до крајот на денот, изјави државната секретарка Џослин Бенсон.
Во изјава за Си Ен Ен таа рече дека преостанува да се пребројат уште околу 100.000 гласови и оти појасна слика ќе има до крајот на денот, по локално време. (Мичиген е шест часа зад македонско време).
Според податоците на Си Ен Ен, по преброени 92 отсто од гласовите, води кандидатот на Демократската партија Џо Бајден со 49,5 отсто наспроти републиканецот Доналд Трамп со 48,9 проценти.
Мичиген носи 16 електорски гласови. Според Си Ен Ен, бајден засега има 227, а Трамп 213 електорски гласови. За победа се неопходни 270.