Идниот германски канцелар Фридрих Мерц изјави дека Украина не треба да влезе во НАТО или во Европската Унија додека е во војна со Русија.
Во вчерашното интервју за Ханделсблат, Мерц нагласи дека воениот статус на Украина го прави нејзиниот пристап во НАТО и ЕУ невозможен во оваа фаза, објави Киев Индипендент.
„Украина е многу голема европска земја, но е и земја во војна“, посочи Мерц, додавајќи дека земја во војна не може да стане членка на НАТО или на Европската Унија.
Тој потврди дека иднината на Украина е во двата сојузи, но инсистираше на тоа дека прво мора да завршат непријателствата.
– Ветувањето за приклучување во Европската Унија останува на сила, како и перспективата за влез во НАТО, рече Мерц, додавајќи дека за да се случи едно или друго, војната прво мора да заврши.
Германија е вториот најголем воен донатор на Украина по САД. На 14 март одлучи да додели три милијарди евра нова воена помош за Украина.