Иранската војска објави дека извршила голем напад врз американските воени бази во Кувајт, додека сателитските снимки, според ирански извори, покажуваат прецизни удари врз клучни објекти во рамките на американската база Арифџан.
„Во текот на изминатите неколку часа, копнените сили на иранската армија лансираа моќен бран таканаречени скитнички беспилотни летала врз американските воени позиции во Кувајт“, се вели во соопштението објавено денес, според иранската Прес ТВ.
Во соопштението се наведува дека различни видови „деструктивни беспилотни летала“ ги таргетирале американските бази во таа држава од Персискиот Залив, во операција која, според иранската страна, претставува една од најобемните акции против американската воена инфраструктура од почетокот на војната.
Локалните медиуми во Кувајт објавија дека се огласиле сирени за воздушен напад, проследени со повеќе гласни експлозии, што укажува дека повеќе ракети погодиле области каде што биле распоредени американски сили.