Наспроти сите предизвици, проблеми и стравувања, процесот на европска интеграција нема никакави други алтернативи, изјави денеска поранешниот италијански премиер Масимо Д’Алема во предавањето на Софискиот универзитет на тема „Предизвиците пред Европа и улогата на младите“.
Според Д’Алема, како што јави БТА, кризите секогаш претставуваат и можност, бидејќи во тешки времиња треба да се најде поттик и сила за изработка на среднорочна и долгорочна визија за заедничката иднина.
– ЕУ се уште има потенцијали да ги мобилизира идните поколенија на млади луѓе, потенцира поранешниот италијански премиер.
Тој нагласи дека ЕУ е единствен пример во историјата на човештвото, која создала „длабоки промени во рамките на животот на една генерација“, додавајќи дека и покрај актуелните проблеми, Унијата претставува еден исклучително голем историски успех.
– Европа може да претставува фактор, само ако е обединета. Единствена алтернатива на маргинализацијата е самата ЕУ, но таква ЕУ која ќе биде способна да дејствува на глобалната сцена како голем играч, смета Д’Алема.
Според него, единствен одговор на критичарите на ЕУ е создвањето на една посилна Европа, која ќе биде во состојба да понуди реални одговори за сите свои граѓани.
– Единствен прифатлив начин на реакција не е да се ослободиме од нашите заеднички обврски, туку да ги засилиме политичките и демократските капацитети на ЕУ, посочи Д’Алема.
Тој нагласи дека ЕУ треба да се бори против исламофобијата во сопствените редови, бидејќи како што рече не е потребен конфликт меѓу исламскиот и христијанскиот евст, туку борба против тероризмот и нетолеранцијата.
– Погрешно е да мислиме дека нашиот модел на демократија би можеле да го пресликаме во странство, додаде поранешниот италијански премиер.
Осврнувајќи се на односите меѓу ЕУ и Русија, Д’Алема нагласи дека тие претставуваат сериозен тест за единството на Унијата, потенцирајќи дека Европа треба да се однесува балансирано.
Според него, сега е потребен нов поттик на европскиот проект, кој не треба да доаѓа само од политичката сфера, туку и од цивилното општетсво.
– Наш најголем непријател е стравот. Стравот води до погрешни избори, до ксенофобија и до расизам, истакна Д’Алема во обраќањето.