Францускиот претседател Емануел Макрон изјави дека е време тој и европските лидери повторно да се вклучат во дијалог со рускиот претседател Владимир Путин, во контекст на тековните напори предводени од САД за прекин на војната во Украина, објави „Фигаро“.
„Мислам дека ќе биде корисно повторно да разговарам со Владимир Путин“, изјави Макрон за новинарите по самитот во Брисел, каде што Европската унија постигна договор за обезбедување 90 милијарди евра за поддршка на Киев.
Макрон рече дека забележал дека некои лидери веќе комуницираат со рускиот претседател, алудирајќи особено на, како што рече, американскиот претседател Доналд Трамп, кој повторно воспоставил контакт со Путин откако се вратил на власт во јануари.