Генералниот директор на Меѓународната агенција за атомска енергија (МААЕ) Јукио Амано предупреди денеска на опасност доколку нуклеарен материјал стигне во рацете на терористите, повикувајќи ги земјите ширум светот да направат напори за да ја минимизираат оваа опасност.
Амано нагласи дека уште 11 земји треба да ги ратификуваат Амандманите на Конвенцијата за физичка заштита на нуклеарниот материјал, пред овој договор да стапи во сила.
Јапонскиот дипломат истакна дека примената на овој договор „ќе ја намали можноста терористите да можат да ја детонираат т.н валкана бомба, која може да рашири радиоактивност на поголемо подрачје. Покрај тоа, со договорот ќе се намали ризикот од напад на нуклеарката“.
Тој додаде дека во МААЕ од 1995 година се пријавени речиси 2.800 инциденти со исчезнување на радиоактивен материјал.