Меѓународната агенција за атомска енергија (МААЕ) е подготвена да пристапи кон проверка на договорот меѓу Иран и земјите од групата пет постојани земји членки на СБ на ОН и Германија, веднаш откако тој ќе биде потпишан, изјави генералниот директор на МААЕ Јукија Амано, кој го поздрави резултатот од преговорите во Лозана, јави ТАСС.
– Со одобрение на Управниот одбор на МААЕ агенцијата ќе биде подготвена да ја исполни својата улога за проверка на исполнувањето на мерките, кои се однесуваат на контролата на нуклеарната програма, откако договорот ќе биде финализиран, се наведува во соопштението на Амано.
Висок претставник на Белата куќа изјави дека меѓународните преговори за нуклеарната програма со Иран работат на механизам, што ќе гарантира пристап на инспекторите на МААЕ до инсталации во Иран во случај на спор.