Шефицата на британската дипломатија Лиз Трас изјави дека Велика Британија веќе договорила со своите партнери од Г-7 и Европската унија (ЕУ) санкции против Русија во случај на нејзина воена интервенција врз Украина.
Таа го изјави ова во интервју објавено денеска за германскиот весник „Велт ам Зонтаг“.
– Отстапките нема да ја спречат Русија да нападне. Мораме да покажеме сила со поддршка на Украина. Треба да гарантираме дека е подготвен строг пакет итни санкции. Веќе ги договоривме тие санкции со нашите сојузници во Г-7 и ЕУ, вклучително и Германија, истакна Трас.
Истовремено, Трас додаде дека Британија обезбедува економска поддршка за Украина, како и поддршка за кибер безбедноста. Лондон испорача одбранбено оружје за Киев и помага во обуката на украинските војници.
Според британската министерка, неопходно е сите членки на НАТО да потрошат два отсто од БДП за одбрана.
Извор: МИА