Лидерите на Германија, Франција, Русија и Украина денеска во телефонски разговор се согласија да дадат нов поттик за почитување на последната спогодба од Минск, од 12 февруари, за воспоставување примирје на истокот на Украина, соопшти канцеларијата на францускиот претседател Франсоа Оланд.
Четворицата лидери го осудија прекршувањето на спогодбата за прекин на огнот во последните неколку дена и се согласија дека пакетот мерки договорен во Минск треба да биде применет „стриктно и во неговата целост“, пренесоа британските медиуми.
„Претставниците на ОБСЕ треба да се состанат со страните на теренот заради побрзата примена на овие мерки“ се наведува во соопштението.
Во текот на денот за деталите од овој план ќе разговараат министрите за надворешни работи на Германија, Франција, Русија и Украина, се додава во соопштението.