Последните разговори со САД за Сирија не вродија со плод, изјави денеска рускиот министер за надворешни работи Сергеј Лавров, истакнувајќи дека верува оти каналот за комуникација со Турција може да стане многу поефикасен.
Лавров наведе дека и понатаму постојат контакти со САД, но дека „секој пат кога за нешто се зборува, САД на крајот се повлекува од договорот“.
– Така беше и во септември и кон почетокот на декември. На нас ни се држат предавања, се бара од нас да дозволиме коридори преку кои ќе преминат екстремисти, но пред се мора да се прекинат воените операции, а дури по неколку денови можат да се формираат такви коридори, истакна Лавров.
Лавров ја даде оваа изјава во момент кога пристигнуваат вести за обновување на судирите во Алепо и одложување на евакуацијата на цивилите.
Рускиот министер за надворешни работи за ситуацијата во Сирија разговараше со неговиот турски колега Мевлут Чавушоглу, по што двајцата повикаа на завршување на насилството во земјата и укажаа на важноста да се обезбеди безбедност за цивилите, јави ТАСС.