Министерот за надворешни работи на Австрија, Себастијан Курц, денеска ги поздрави мирните избори во БиХ, кои, како што оцени, минале без никави инциденти и изрази надеж дека што поскоро ќе дојде до формирање на нова влада, која ќе го надмине застојот во спроведувањето на реформите.
Курц нагласи и дека БиХ ќе може да се зачлени во ЕУ само во сегашните граници.
– Приближувањето кон ЕУ ќе биде можно, само тогаш кога Владата ќе работи ефикасно. Премногу долго во БиХ се работеше само за лични интереси, а помалку за доброто на државата, оцени Курц.
Според него, Австрија и натаму е подготвена да ја поддржи БиХ на патот кон ЕУ, но тоа ќе биде можно само кога земјата ќе ги исполни своите задачи.
– Јас сум уверен дека политичарите ја сфатија мојата порака. Идната членка на ЕУ, БиХ може да биде прифатена во (европската) заедница само во сегашните граници, додаде Курц.