Претседателот на САД, Доналд Трамп, лично ќе го дочека рускиот претседател Владимир Путин откако неговиот авион ќе слета во Алјаска, изјави портпаролот на Кремљ, Дмитриј Песков.
За време на четиричасовниот лет од Магадан до Анкориџ, според Песков, Путин ќе проучи обемни документи.
„Тој ќе подготви тези за сите прашања. Иако, секако, прашањето за украинското решение ќе биде во преден план, постои и список на контроверзни прашања во нашите билатерални односи, можни се проекти за економска соработка, сите аспекти на решавање на украинскиот проблем, тоа се тези за регионални и меѓународни прашања. Ова е огромна количина материјал, кој, секако, претседателот секогаш го чита и проучува многу внимателно“, одговори Песков.
Тој додаде дека Путин „ќе замине за Алјаска на време и ќе слета во 11 часот по локално време“.
На самитот на двајцата лидери, потврди Песков, украинското прашање ќе биде главен приоритет, пренесува РИА Новости.
Рускиот претседател никогаш не пропушта можност да се справи со регионалните прашања, изјави портпаролот на Кремљ, осврнувајќи се на посетата на Путин на Магадан на далечниот исток на Русија, кратко пред неговото патување во Алјаска.
„Секако, патувајќи во таа насока, имајќи ја предвид географијата на нашата земја, претседателот никогаш не пропушта можност да се справи со регионалните прашања. Тој ќе го стори тоа и овој пат, а потоа ќе се упати кон Алјаска и ќе се справи со руско-американските работи“, рече Песков.
Претседателите на Русија и САД, Владимир Путин и Доналд Трамп, ќе се сретнат денес во Алјаска. Главни теми на преговорите, како што е најавено, ќе бидат прашањето за Украина и нормализацијата на односите меѓу Москва и Вашингтон. Средбата започнува во 21:00 часот по средноевропско време.
Како што е најавено, прво Путин и Трамп ќе разговараат насамо, а потоа средбата ќе продолжи како дел од работен појадок на кој ќе учествуваат и делегациите на Русија и САД.
Руските медиуми објавија дека членовите на руската делегација ќе бидат министерот за надворешни работи Сергеј Лавров, министерот за одбрана Андреј Белошов, министерот за финансии Антон Силуанов, директорот на Рускиот фонд за директни инвестиции Кирил Дмитриев и помошникот на рускиот претседател Јуриј Ушаков.
Државниот секретар на САД Марк Рубио, секретарот за трговија на САД Хаурад Лутник, секретарот за финансии на САД Скот Бесант и директорот на Централната разузнавачка агенција (ЦИА) Џон Ратклиф ќе бидат дел од делегацијата на САД на состанокот со руската делегација во Алјаска, објави Ројтерс.
По состаноците е планирана заедничка прес-конференција, а руската делегација планира веднаш потоа да ја напушти Алјаска. Патем, за да се овозможи состанокот на територијата на САД, Вашингтон суспендираше низа антируски санкции.