Израелскиот министер за одбрана Јоав Галант вели дека воената кампања во Газа „може да трае еден месец, два или три, но на крајот нема да има веќе Хамас“. Галант ја даде изјавата по оперативниот брифинг во Центарот за оперативна команда и контрола на израелските воздухопловни сили.
„Во однос на оперативните аспекти на маневарот, на крајот на денот, ништо нема да ги спречи ИДФ (Израелските одбранбени сили). Ова треба да биде нашата последна маневарска операција во Газа, од едноставна причина што после тоа нема да има повеќе Хамас“, рече тој.
Министерот изрази благодарност до воздухопловните сили и рече дека следната фаза, толку очекуваната копнена операција, „ќе дојде наскоро“. Колку брзо останува нејасно.
Од нападот на Хамас на 7 октомври, Израел ја бомбардира Газа и собира војници долж границата, во очигледна подготовка за копнена офанзива.
Во одделни интервјуа, двајца портпароли на ИДФ се осврнаа на прашањето кога ќе се случи таква офанзива.
Потполковникот Питер Ленер изјави за Би-Би-Си дека тајмингот ќе ги земе предвид напорите за ослободување на десетици заложници држени од Хамас.
„Копнената офанзива, доколку се случи, ќе биде во најдобриот оперативен момент“, вели тој.
Во меѓувреме, потполковникот Џонатан Конрикус изјави за австралиската радиодифузна корпорација дека „војната ќе заврши доколку Хамас се предаде и заложниците бидат ослободени“.
Ако Хамас одбие, рече Конрикус, „веројатно ќе треба да влеземе и да го направиме тоа“.
„Крајната состојба на оваа војна е разбиениот Хамас кој никогаш нема да може да му се заканува на ниту еден израелски цивил“, рече тој.