Кинеската полиција спасила 92 деца и две жени, кои биле киднапирани од една криминална банда за да бидат продадени, а во го0лемата акција е приведено 301 лице, јавија денеска државните медиуми.
Ова е едно од најобемните апсења во последните години, пренесоа британските медиуми.
Полицијата неодамна изведе истовремена рација на повеќе локации во 11 кинески провинции, по шест месеци истрага, јавија државните медиуми, повикувајќи се на Министерството за јавна безбедност.
Засега не е соопштено кога точно децата биле спасени. Не е познато ни колку меѓу нив се момчиња, а колку девојчиња. Традиционалната наклонетост кон момчињата, посебно во селските области, и стриктната политика на едно дете, во последните години доведоа до зголемен број криумчарења на деца и жени.
Киднапираните жени се продаваат во руралните области, на мажи кои не успеале да се оженат.
Државната телевизија наведе дека на киднаперите ќе им бидат изречени остри казни.
Кинеската агенција Ксинхуа додаде дека ќе бидат казнени и родителите кои си ги продаваат своите деца.
Пред две години, кинеската полиција соопшти дека во претходните две години спасила повеќе од 13.000 киднапирани деца и 23.000 жени.