Американскиот шеф на дипломатијата Ентони Блинкен денеска ја осуди заканата на рускиот претседател Владимир Путин со нуклеарно оружје како „неодговорна“. Претходно, Кремљ денеска објави дека промените што ги најави Путин во руската нуклеарна доктрина треба да се сметаат за „специфичен сигнал“ до Западот.
„Тоа е целосно неодговорно. Мислам дека многумина во светот го кажаа тоа јасно кога Путин се заканува со нуклеарното оружје – вклучително и Кина“, рече Блинкен во интервју за MSNBC.
„Затоа сакам да го повторам истото сега, во време кога целиот свет се собра и зборуваме за потребата од разоружување и неширење на нуклеарното оружје“, рече Блинкен, кој учествува на Генералното собрание на ОН што се одржува во Њујорк.