Лидерите на Канада, Џастин Трудо и Мексико, Клаудија Шејнбаум, разговараа телефонски со американскиот претседател Доналд Трамп минатата недела за да најдат решение откако тој воведе царини за нивните земји, но се чини малку веројатно дека кинескиот претседател ќе упати сличен повик во скоро време.
Пекинг, кој, за разлика од своите блиски американски партнери и соседи, со години е во трговска и технолошка војна со САД, за време на неговиот втор мандат има поинаков пристап кон Трамп, со што јасно стави до знаење дека сите преговори треба да се водат на еднаква основа.
Кинеските лидери велат дека се отворени за разговори, но се подготвуваат и за повисоки американски царини, кои се зголемени за 20 отсто откако Трамп ја презеде функцијата пред седум недели, пишува АП.
Не сакајќи да бидат фатени како што беа за време на првиот мандат на Трамп, Кинезите беа подготвени со одмазднички мерки – наметнувајќи свои царини минатата недела за клучниот увоз на земјоделски производи од САД и многу повеќе.
„Додека Вашингтон ги зголемува царините, Пекинг не гледа друга опција освен да возврати“, рече Сун Џун, директор на кинеската програма во Центарот Стимсон, тинк-тенк со седиште во Вашингтон.
Ова не значи дека Пекинг не сака да преговара, но не може да се гледа како молба за преговори или милост.
Како втора по големина економија во светот, Кина се стреми да биде голема сила и на регионалната и на глобалната сцена, барајќи почит од сите земји, особено од САД, како доказ дека Комунистичката партија ја направи Кина просперитетна и силна.
Откако САД додадоа царини од 10 отсто минатата недела, над постојната царина од 10 отсто наметната на 4 февруари, кинеското Министерство за надворешни работи ја објави својата најжестока осуда досега:
– Ако војната е она што го сакаат САД, без разлика дали тоа е тарифна, трговска или било кој друг вид војна, ние сме подготвени да се бориме до крај.
Се повторува острата реторика од 2018 година, кога Трамп ја започна својата прва трговска војна со Кина и таа не успеа да возврати.
Оттогаш, лидерите во Пекинг развија збир на мерки за царини, ограничувања на увозот, извозни контроли, санкции, регулаторни ревизии и мерки за ограничување на операциите на американските компании во Кина.
Сите контрамерки на Кина се дизајнирани да нанесат болка на американската економија и бизниси како одговор на американските мерки.
Тоа и овозможи на кинеската влада брзо да одговори на неодамнешното убедливо удвојување на новите царини на кинески производи од страна на Трамп со воведување низа одмазднички мерки, вклучително и оданочување на многу американски земјоделски стоки до 15%, суспендирање на увозот на американска граѓа и ставање на црната листа на 15 американски компании, пишува АП.