Италијански суд ќе преиспитува 300 година стара пресуда со којашто во гратчето Брентонико, Марија Бертолети Толдини ди Пилканте е осудена на смрт, откако судот без дилеми утврдил дека е вештица.
Несреќната жена, која била сметана за една од последните живи вештерки, е погубена со отсечување на главата и потоа изгореа на 14-ти март 1716 година, во ова планинско гратче во северна Италија. Судењето било одржано во Брентонико откако жената по измачувањето признала сé што од неа било барано, односно дека е вештерка, дека убивала деца, дека е богохулна и за низа други злосторства.
Претставникот на градската управа Квинто Канали изјави дека повторното судење е потребно за луѓето да се потсетат дека судењето на „вештерките“ биле вистинско злосторство против човечноста, а не само стари легенди и народни приказни.
На негово поттикнување, историчарите собрале докази и градската управа го обврзала апелациониот суд во Тренто да го презиме случајот врз основа на законите кои биле на сила пред 300 години.
Судиите ќе го одржат судењето, така што нема да ги попречува нивните современи правосудни обврски.