Институтот за проучување на војната (ISW) во својот нов извештај наведува дека основачот на платеничката група Вагнер, Евгениј Пригожин, тврди дека новинарите неодамна му поставиле прашање што разоткри заговор зад кој стојат рускиот претседател Владимир Путин и секретарот на рускиот совет за безбедност Николај Патрушев.
Во извештајот на ISW се наведува дека на 16 март прес-службата на Пригожин објавила наводно барање за коментар испратено до шефот на Вагнер од рускиот весник Независимаја газета. Пригожин тврди дека бил прашан дали знаел за наводните разговори меѓу Путин и Патрушев за иднината на Вагнер.
Пригожин тврди дека целта на Путин и Патрушев била да го поткопа и неутрализира Вагнер.
Прес-службата на Пригожин наведува дека информациите за разговорите меѓу Путин и Патрушев неодамна кружеле на руските и украинските канали на Телеграм. Службата тврди дека Патрушев му рекол на рускиот претседател дека од Вагнер нема да остане ништо за еден и пол до два месеци.
„Патрушев предложи дека по уништувањето на Вагнер во Украина, Пригожин ќе се обиде да ги обедини поранешните и преостанатите активни борци на Вагнер под измислен изговор, да ги вооружи и да ги испрати на територијата на Русија за да ја преземе власта во регионите што граничат со Украина со можно напредување во внатрешноста.
Патрушев веќе нареди набљудување и контрола на движењето на поранешните борци на Вагнер, а Путин се согласи со тоа и му се заблагодари на Патрушев за неговите напори да го неутрализира Вагнер, а особено Евгениј Пригожин“, се вели во соопштението на прес-службата на Пригожин.
ISW во извештајот пишува дека не наишла на информации кои би навестиле дека такви разговори се воделе меѓу Путин и Патрушев.
„ISW нема слушнато никакви шпекулации дури и во рускиот информативен простор за наводните разговори“, се вели во извештајот. „Независимаја газета“ на својата веб-страница не објави ништо за наводниот заговор против Пригожин и Вагнер. Ова никаде не се споменува освен во соопштението на прес-службата на Пригожин.
„Нема потврда за оваа тема, што сугерира дека Пригожин конструирал заговор за да го промовира Вагнер и неговата сопствена репутација“, објави ISW.