Иранските власти денеска погубија уште еден осуденик за наводни злосторства извршени за време на протестите што избувнаа во 2022 година низ целата земја по смртта на една млада жена во притвор на полицијата за морал.
Според извештајот на државната телевизија, Мохамад Кобадлу бил егзекутиран откако бил осуден за убиство на еден и ранил пет полицајци, кои ги прегазил со својот автомобил за време на протестите во градот Паранд, во близина на главниот град Техеран, пренесува АП.
Во извештајот на иранската телевизија се вели дека 23-годишниот Кобадлу го признал своето дело, имал свој адвокат за време на судењето и ја обжалил смртната казна изречена од понискиот суд, но Врховниот суд подоцна ја потврдил првостепената пресуда.
Според Асошиејтед прес, егзекуцијата на Кобадлу е деветта откако избија протести во есента 2022 година.
Месечни немири следеа по смртта на 22-годишната Махсе Амини на 16 септември 2022 година, во притвор на Полицијата за морал, која ја приведе поради несоодветно неносење задолжителен хиџаб.
За време на протестите загинаа најмалку 529 луѓе, а десетици илјади други беа приведени.
Демонстрациите постепено згаснаа во првите месеци од минатата година.