Иранскиот претседател Масуд Пезешкијан изјави денеска дека неговата земја е подготвена за дијалог со Соединетите Американски Држави „на рамноправна основа“, без да појасни дали Техеран прифаќа директни преговори како што предложи Доналд Трамп.
Американскиот претседател, кој го покани Техеран да преговара за иранската нуклеарна програма, во последните денови се закани дека ќе го бомбардира Иран доколку работите не можат да се решат преку дипломатски средства.
Иран вели дека е подготвен да разговара со САД, но одбива директни разговори под закана и притисок.
„Исламската Република Иран сака дијалог на еднаква основа“, рече Пезешкијан.
Доналд Трамп во четвртокот истакна дека повеќе би сакал „директно да преговара“ со Иран. „Така се оди многу побрзо и многу подобро ја разбирате другата страна отколку ако користите посредник“, смета американскиот претседател.
Иранците „сакаа посредници, но мислам дека тоа веќе не е така“, им рече Трамп на новинарите во Ер Форс 1.
Која е целта на заканите ако сакаме да преговараме“, се запраша денеска Пезешкијан.
„Во денешно време, Америка не само што го понижува Иран, туку и целиот свет“, рече тој, веројатно алудирајќи на тарифите што ги воведе Трамп за сојузниците на Соединетите Американски Држави.
Западните земји, предводени од Соединетите Американски Држави, со децении се сомневаат дека Техеран сака да се здобие со нуклеарно оружје. Иран ги отфрли и се уште ги отфрла ваквите обвинувања и тврдења дека нуклеарните активности во земјата постојат само за цивилни цели, особено за енергетски цели.
Во 2015 година, земјата склучи договор со постојаните членки на Советот за безбедност на ОН (Кина, Русија, САД, Франција и Обединетото Кралство) и Германија за регулирање на нејзините нуклеарни активности.
Текстот предвидува олеснување на санкциите во замена за следење на иранските нуклеарни активности.
Во 2018 година, за време на неговиот прв мандат, Доналд Трамп ги повлече САД од договорот и повторно воведе санкции кон Иран. Како одмазда, Иран се огради од документот, забрзувајќи ја својата нуклеарна програма.
Али Лариџани, близок советник на врховниот лидер на Иран, ајатолахот Али Хамнеи, во понеделникот рече дека Иран не сака да се здобие со нуклеарно оружје, но дека, во случај на напад врз земјата, „нема да има друг избор освен да го направи токму тоа“.