Нападите на израелската армија врз новинарите и медиумските куќи во текот на неодамнешната осумдневна операција во Појасот Газа претставуваат кршење на законот за војна, соопшти организацијата за човекови права Хјуман Рајтс Воч (ХРВ).
Двајца палестински камермани се убиени и најмалку десет вработени во медиумите се ранети во оваа офанзива, потсетуваат американските медиуми.
Израелската влада соопшти дека сите нападнати биле легитимна воена цел.
Организацијата за човекови права, чие седиште е во Њујорк, меѓутоа, смета дека нема оправдување за таквото тврдење.
-Само затоа што Израел кажува дека новинар бил борец или дека ТВ станица била команден центар, тоа не го оправдува, изјави Сара Леа Витсон, директор за Блискиот исток во ХРВ.
Израелската армија соопшти дека делувала „во согласност со законите на вооружените судири, и покрај намерното кршење на овие закони од страна на терористичките организации во појасот Газа“.
Војската наведува дека ги истражува случаите споменати во извештајот на ХРВ и дека ќе одговори кога истрагата ќе биде завршена.
Офанзивата на Појасот Газа за цел имаше да го запре ракетирањето на југот на Израел од оваа палестинска територија. Во неа погинаа речиси 170 Палестинци и шестмина Израелци. Таа беше завршена на 21 ноември со прекин на огнот во кој посредуваше Египет.